Breda SA471, 28-Oct-1566

met dank aan Eimert van der Beek voor deze vondst
------------
Bronvermelding
Vestbrieven 1566, Schepenbank Breda 1499-1811, inventarisnummer 471, blad 191r
Gemeente: Breda Periode: 1566
(Akte)datum: 28-10-1566

index gegevens:
Geregistreerde Willem Willem Aerts
Diversen: Te Andel in het land van Altena. Man van Aleyde Joost Willems.

https://stadsarchief.breda.nl/collectie/archief/genealogische-bronnen/deeds/20c6303d-edcc-4bf3-bac6-0114c97de6d9
---------------
[scan nr. 404; fol.191-R]

Broeck Montans ?quam? Willem Willem Aertz zone tot
Andel int lant van Althena woonende als man ende
voight inden name van Aleijde Joost Willems dochter
zijn huysfrou voor de welcke hij Willem voirgen. hem sterck
maecte ende dezelve verving, heeft vercoft Lanceloten
van Wijfliet onsen mede schepen een gerecht derdendeel
der voirgen. Aleijden Joost Willems dochter zijnre huysfr[ou]
competerende ende bij testamente van wijlen Gheriden
Adriaen Druyts zoine heur oom was gemaect ende
gelaten zijnde alzoo de voirgen. Willem heur man
zeijde in ende van alsulcke zess karolus gulden
ende thien stuvers elcken karolus gulden tot veertich
grooten vleems 't sjaers erfchijns ter quytinge tot
twee malen ende telcken male de helft oft teffens
ende t'eenen male in dien men wil elcken penninge
erffelick met zesthien gelijcke penningen eens
te geven opten chijnsdach ende metten verschenen
chijnse als Gherit Jan Gherits zone tymmerman
geboren van Bavel den voirgen. wijlen Gheriden
Adriaen Druyts zoine in rechter erfvorwaerde verlijt
heeft gehadt alle jaer op sint Jans dach baptisten
in junio te betalen uut ende op zijn huys ende
erve metten hof daerachter aen leggende ende oick
metten hofstadt oft ledich ende onbetymmert erve
daer voir aende strate liggende ende met alle
zijn toebehoirte d'welck hij Gherit Jan Gherits
zone voorgen. aldoen vanden voirss. Gheriden
Adriaen Druyts zone gecoft ende vercregen heeft
gestaen ende gelegen tot Breda op't Gasthuys
eijnde neven des voirgen, Gherit Adriaen Druyts zoons
ander huys ende erve d'welck hij aldoen behouden
heeft opte westzijde ende Anthonis Jan Jan Floris
zoons ganck oft bory?wech ende erve geheel tot
zijn huys ende erve aldaer behoirende opte oost zijde
achter te weten zuytwaert comende aen desselven
Anthonis Jan Jan Floris zoons huys oft wooninge
ende erve daer achter staende ende liggende.
Te vrijen ende te waren den onderpandt voirss.
met dertich stuvers ende drie ort stuvers elcken
stuver tot drie grooten brabants erfchijns in twee
parcheelen 't zij erffelick oft ter quytinge zoo

[scan nr. 405; fol. 191-V]

alse zijn ende met noch vyer rijns gulden 't stuck tot
veertich grooten vleems erfchijns ter quytinge den penn.
zesthien oick in twee parcheelen daer jaerlicx voir
uutgaende. Alnae uutwijsen der schepenen briefs
in Breda [-alhier op-]
    vande zess karolus gulden ende thien stuvers 't sjaers voorss.
zijnde van date anno XVc vyer ent zestich
dertich dage in decembr[is]. Ende de voirgen. Willem
Willem Aerts zone inden name als voir geloofde vercofte
een derdendeel in ende van de zess karolus gulden ende
thien stuvers 't sjaers ter quytinge voirss, te vrijen ende
te waren vrij ende loss van alle commer last ende
calaeng?ie? Enengelijck uutgaende mette andere
twee derdendeelen vande zelve zess karolus gulden
ende thien stuvers 't sjaers Lanceloten ende Claren
wijlen Frans Adriaen Druyts zoons zoon ende dochter
toebehoirende ende hen bij testamente vanden voirgen.
wijlen Gheriden Adriaen Druyts zone honnen oom
oick gemaect ende gelaten zijnde, zoo wij verstonden.
Ende het is verwaert dat 't vercofte een derdendeel
van de zess karolus gulden ende thien stuvers voirss.
den voirgen. Lanceloten van Wijfliet als yerstmael
verschijnen zal t'Sint Jans dage in junio anno XVc
zevenentzestich naestcomende, gevest. Actum
a[n]no XVc zessentzestich achtentwintich dage in octobri.