NoordBrabant Coll_RA16, 27-Mar-1572

Collectie van het Rijksarchief inv. 16
[BHIC, Collectie Rijksarchief, 178, inv.nr.16, f. 82]
----
p166
----
onsen rijcken te wetene van Spaenguen ende Sicilien
't XIIII ende van Napels 't XVIe. Op te ploije stont
gescreven: Bijden Coninck in sijnen raide, onderteijckent
van der Aa.

fol.82
Testament van den voorsz.
Jan Pieck

Up huijden den XXVII martij anno XVc.LXXII stilo
communi heeft Joncker Johan Pieck, ambochsheere
van Ghijsen, zijn uuijterste wille ende testament ge-
ordonneert ende gemaect mitsdesen, ende dat in pre-
sentie van Mathijs Dircksz. als gemachticht schout
tot Ghiecen, Willem Willemsz. ende Zeger van Emmichoven
Leonijsz. ende Jan Corn.z. ende Jan Engebertsz. als heem-
raeden, ende dat onverbreeckelick ende van waerde te
voldoen ende te volhouden. Welcke testateur om
merckelicken ende sonderlinge redenen hier toegeperst
wordt, ende hem selven hijer toe voegende mit goeden
wille ende mit goeden verstande, ende wel hebbende
ende gebruijckende sijn verstandt mit sijn vijff zinnen,
ende dat in deser maniere hier naevolgende. Inden
eersten maect desen testateur Godt van Hemelrijck
Almachtich sijn ziel ende sijn lichaem de geweijde
aerde tot Ghiecen. Noch maect den selven testateur
jaerlix den Heijligen Geest tot Ghiecen, Kerck, Pastorij
ende Costerij des jaers vijff en twintich stuijvers daer
die kerck, Pastorij ende Heijlige Geest aff sullen
hebben die tweede deel, ende die pastoor ende coster
dat derdendeel onder huer beijden, des sullen pastoor
ende coster indier tijt sijnde Jan Pieck voorsz. mit sijn
----
p167
----
huijsvrou Joncfrou Marie van Boechorst jaerlicx daer
voor te houden haer lijeder jaere euwige memorie inder
kercke van Ghiecen. Ende des sal die kercke van Ghiecen
schuldich wesen te luijchten op sijn oft haer jaergetijden
ende dese vijffentwintigh stuijvers tsjaers salmen heffen op
een stuck landts geheeten het zant, ende salmen die voorsz.
vijffentwintigh stuijvers moegen lossen mit den pennincj XVI
naer advenant, ende sullen alle verschijnen opten jaerge-
tijde van den voorn. testateur. Noch maect den selven
testateur ende duwarijt sijn huijsvrouwe Joncfrouwe
Maria van Boechorst haeren leven lanck het Zant also
genoempt die bruijkweer, daeraff mittet huijs ende andere
timmeragie daeropstaende mit ten boomgaert ende voorts
soe alst daer gelegen es, nijet uuijtgesondert ende groot
zijnde omtrent thijen margen inden houffslach met grien-
dingen oft olsen corsboogerden, alsoe te samen nijet
uuijt gesondert aldaer binnen den ban van Ghiecen ge-
legen sijn, uuijtbrengende jaerlicx stijff tweehondert gul[den].
Hier mede bij getoegen allen den imboel ofte huijsraet ende
denselven huijsraet ofte imboel nijet van den huijse te ver-
brengen ofte te hergewaijen, ende die 't gebruijck van 't zant
sal hebben t'eijnden 't overlijden van den testateur sal
gehouden sijn die hop int hopvelt te laten leggen, ende nijet
uuijt te moegen werpen oft smaaken, ende die selve hop te
onderhouden als zulcx toebehoort ende oirbaer zal sijn,
ende welcke thien margen t'eijnde dije doot van Joncvrouw
Maria van den Boechorst sullen succederen ende vallen
weder op Heijnrick Pieck, sijnen ousten soon. Noch maect
die voirsz. testateur sijnen ousten zoen Heijnrick Pieck
den Wenaert met sijne vrij heerlickheijt gelijck als die
daer gelegen is met die ambochsheerlicheijt van Giesen.
Noch maect dese testateur Heijnrick Pieck sijnen----
p168
----
outste zoen den Nijsschet groot XV margen ende voorts soe dien
selve Nijesschet aldaer gelegen es nijet uijtgesondert huijs,
berch, schuijer ende andere timmeragie, voorts griendingen,
kersbogerden ende soe denselven Nijsschet aldaer is gele-
gen, ende op die welcke Nijsschet leet eens IIIc. guldens
't hondert onder te moegen houden om ses gelijcke guldens
tsiaers ende te moegen lossen met anderhalff hondert
guldens des smaels ofte teffens, ende is jaerlicx gel-
dende hondert dertich guldens. Noch moet de voorn.
Heijnrick Pieck houden tot sijnen laste opten voorsz.
Nijschet ende opte voorgenoemden goederen Heijnrick
Pieck voorsz. toegevoucht ende gemaect sijnde eens
duijsent guldens van twintich stuvers 't stuck den
gulden gereeckent onder te moegen houden om ses
gelijcken guldens tsjaers, liggende althans nu ter tijt
opt Hoff tot Andel, ende men machsche lossen te
weten die duijsent guldens mit derdehalff hondert
guldens desmaels, ofte teffens. Noch maect desen
testateur Henrick Pieck sijnen zoon een stuck lants
groot sijnde oft liggende voor drie mergen landts geheeten
den Gheer, soe groot ende cleijn ende mit sijn toebehoeren,
als den selven Gheer in Sinte Rombouts polder gelegen es.
Noch maect den selven testateur Heijnrick Pieck, sijnen
zoon drije mergen lants int Endevelt, genoemt Wolff
Aertsz. Hagencamp mit sijnen toebehoeren, ende es
jaerlicx geldende XV guldens. Noch maeckt dieselve
testateur Joncvrou Johanne Pieck, sijn dochter, het
Hoff tot Andel, soo groot ende cleijn als daer gelegen is
tot Andel, geldende des jaers hondert XX guldens, sonder
sijn toebaet, mitten huijs, berch ofte schuere ende andere
timmeragie daerop staende, voorts boomgaerden
ende andere beteulingen, soe die selve aldaer tot

----
p169
----
Andel gelegen is. Noch maect dese voorn. testateur Joncfrou
Johanna Pieck voorsz. anderhalff mergen lants gelegen in de Riet-
campen over den hootgraeff in NeerAndel genaempt Heijnrick
Stevens landt, geldende des jaers die somme van XII guldens.
Noch drie margen gelegen in de selve Rietcampen ende vijff
mergen gelegen gelegen in Giesen opte Weij genoempt die
Bazeldonck, geldende t'samen dese voorn. acht mergen
des jaers LI gulden vrij geldts, welcke voorsz. acht
mergen sij Joncvrou Johanna voorsz. nijet eer aenvangen
en sal dan nae de dode ende afganck van beijde haer
moeder inden clooster tot Antwijck ende St. Servaes
residerende. Noch drie mergen landts ende sommige
roeden gelegen inde ban van Ghiesen ende Rombouts
polder genaempt Peter Smeets landt, geldende wel XXI
guldens stijff mitten erffchijns die daerop leet te
weten vier schilt 'sjaers die ons Lieff vrouw tot
Worcum toecoemen, ende 'tsiaers ontfangende sijn.
Noch maect deselve testateur Joncvrou Johanna
sijn dochter voorsz. die helft van drie mergen
lants gelegen opte Weij in Ghiesen mit den vogelcoije
daerop leggende de welcke gecoemen is van Roeloff
Willemsz. erffgenaemen, geldende 'tsiaers negen gulden
s[t]ijff. Noch maect dese testateur joncvrou Johanna
sijn dochter voorsz. vijftich carolus guldens van
twintich stuijvers stuck des jaers die sij op haeren
oom Gijsbrecht Pieck tot Beest jaerlicx heffen
ende bueren sal. Noch maect die testateur voorn.
sijne voorn. dochter thien hont lants gelegen op
Vrericks acker tot Beest des jaers geldende XVII
guldens. Noch acht hont off acht halff hont
lants gelegen tot Beest opten Hoomborch des
siaers geldende thien guldens op welcke twee
----
p170
----
perceelen van lant gelegen sijn eens IIc. guldens die haer moije
Uijckg[?] daerop heeft. Welcke IIc. guldens men lossen mach met
een hondert guldens teffens oft smaels. Noch maecjt die
testateur in manieren als vooren Heijnrick Pieck sijnen
ousten soon acht mergen lants gelegen binnen den ban van
Ghiecen gecomen sijnde van Francoijs Cornelisse van Suken,
te weten die beterschap van dien, aengesien datter noch thien
hondert guldens opleggen. Noch maect dieselve testateur
inde qualiteijt als boven sijn huijsvrouw Maria van den
Boechorst mit haeren kinderen geprocreert bijden voorsz.
testateur het gewas vanden jare ofte zoemer van LXXII
't sij van winterkoorn op het velt staende, kersen, appelen,
peeren, pruijmen, arweten, bonen, haver oft garst, hop, hoe-
danich die selve vruchten moegen gevallen inden somer
van LXXII altoes egeen uuijtgesondert van allen alsulcke
landen als die voorn. testateur achter mach laten 't sij
weijlandt ofte ackerlant off die pachten oick vanden
voorsz. jaere van eenige van verhuijr landt te moegen
opbeuren ofte oick venten, hoedanich die gevonden moegen
worden, allen t'ontfangen dit jaer van LXXII ende off
daer eenige renten verscheenen Petri anno LXXIII die sullen
hierinne mede gerekent worden. Ende dat deur dien die
selve erfgenamen hierboven verclaert die achter gelaten
schult sulen moegen betaelen, mitsgaders dan joncvrou
Marie vanden Boechorst noch sal moegen houden voir
uuijt ende voir all drije van de beste koeij tot haerder
alimentatie oft nootdruft, mitte drie mergen gecoft
sijnde van Wolff Aertsz., gelegen int Endevelt, ende die
zelve drije mergen te gebruijcken dit jaer LXXII tot be-
houff als vooren. Begeerende den testateur voornt.
dat alle dese voorsz. ende voorn. articulen ende
puncten altesamen onverbreeckelicken ende van
----
p171
----
CLV

waerden gehouden sullen worden, nu ende ten eeuqige dagen,
minlick ende vriendelick mitten anderen te vreden wesende,
gelijck sulcx behoort, ende dat uuijt oorsaecke van sekere
octroije geadmitteert van den grooten rade des Conincklicke
Ma[jestei]t van Spaengien van date duijsent vijffhondert LXIX den
XVe dach van november, de welcken ons scholtus ende
heemraders van Giesen voornt. vertoont is ende heeft laten
openbaren. Noch begeert die testateur voornt. vrien-
delicken op sijn twee broeders Ot Pieck ende Ghijsbrecht
Pieck, ende op sijn swager Cornelis van Boechorst, dat
sij luijden gesamenderhant voir haer luijden willen ac-
cepteren ende aenneemen die tutoirscap ende curatoirscap
van sijn twee voorn. kinderkens tot haeren mondigen
jaeren toe, dat is te weten tot dat die selve kinderkens
out sullen moegen wesen XXIIII jaren, endt tot al-
sulcken tijde toe die tutoirscap te willen bedienen
ende dat selve officium van dien nijet eer te willen ver-
smacken. Alles sonder bedroch ofte argelist, actum inden
jaere maent dach als boven, in presentie schout ende
heemraders van Giesen als voore verclaert staet, die
welcken hier rechtelicken toe geroepen ende versocht sijn
ende elck bijsonder haeren naem ofte merck hier onder be-
needen van desen gestelt hebben, actum als vooren ende
principael mede zullen bezegelen. Onderteijckent Mathijs
Dircxsz. sijn merck, Willem Willemsz., Zeger Loijen van
Emmichoven, Jan Cornelisse, Jan Engebertsz.

Douwarie Joncvr. Marie van den
Bouckhorst, weduw van Jan Pieck.

fol. 87 verso.
Ph[i]l[ip]s ad doen const allen luijden alsoe Joncheer Johan