Heusden RA337, 05-Mar-1602

Dat Grietken Diricx dochter van Andel, woenende tot Giessen inden
lande van Althena, geassisteert met Wouter Hannaertssz., schout tot
Veen, als haeren voocht in dese, als mede erffgen. van Diricxken
Dirick van Andel dochter, in haer leven huysvrouwe van Jan
Adriaenssz. uuyt Broeck, haer sa. suster, mits dese bekende bij
accord ende uuytcoope voldaen ende vernuecht te wesen vande
achtergelaete goederen ende successie op haer comparante
mits d'overlijden van haere suster voer haere contingent
geadvolueert waer om den voirn. Jan Adriaensz. sa. de lijftochte
bij testament gemaect was. Soe leen als allodiale goederen,
egeene uuytgesondert, alles conform het contract van uuytcoope
bij haer comparante ende den voirss. Jan Adriaenssz. sa. opten
lesten februarij 1600 voer natoris ende getuygen gepasseert.
In conformite van welck accord sij comparante mits desen
verclaerden opte voirss. successie ende haer gerechticheijt
te verthijen ten behoeve van Wouter Adriaenssz. Bieshuevel,
Steven Stevenssz. als man ende voocht van Cornelisken Adriaensdr. ende
Adriana Adriaens dochter als erffgen. van[de] voirss. Jan Adriaenssz. uuyten
Broeck, deselve mits desen tot haerl[ieder] behoeff cederende ende transporterende
sonder daerover eenig recht meer aen te behouden. Den Ven martij
1602. Ende was ondert[ekend] Daniel Peterssz., H. van Gemert.