Heusden RA350, 01-Jun-1616

Dat Aert Adriaenssen, woonende tot Andel inden lande van
Altenae, verteech op eene huijsinge, ende hoffstadt groot
omtrent vier honden lants soo hoplandt, als boomgaert zijnde,
staende, ende gelegen inden dorpe van Drongelen, ofte zoo
groot ende cleijn 't zelve aldaer staende, ende gelegen is, belent
Adriaen Adriaenssen erve oostwaert, den banne van Drongelen
westwaert, streckende voor vande strate aff totten
banne van Doveren toe, metten dijck, thuijn, sloot, mase, ende
weteringe die daer metten recht toebehooren, ende op alle
alzulcke brieven, ende voorwaerden als daer aff sijn, ten
behoeve van Anthonis Janssen de Haen, woonende
jegenwoordich tot Genderen, als hem egeene recht daer
meer aen te behouden. Ende gelooffden waerschap
uuijtgenomen acht vaten terwen jaerlicx die 't gasthuijs
van Heusden daer op heffende is ter losse met zeventien
gulden thien stuijvers eens, ende niet meer thijns, noch
pachts, daer onder verbindende sijnen persoon, ende goederen
hebbende, ende vercrijgende. Actum den eersten junij 1616.
Coram S. Aertssen ende A. van Cuijck.
-Sijmen Aertssen, 1616
-A. van Cuijck, 1616

Vercofft om IXc gulden in
negen termijnen t'elcken mael
ende jaer Ic. gulden beloopt
den XLen penninck ----