Holland Hof_van8I, 17-Jun-1598

[scan 130]
[marge:] fiat et peritur Actum inden hogen rade den XVIIen junij acht ende tnege[n]tich

Aen mijn E. Heeren vanden
Hooghen raede in Hollant

Geven mit behoorlicke reverentie te kennen
deken ende capitule van Oudemunster tot
Utrecht hoe dat hen supplianten inden ban van
Neerandel inden lande van Althena competeeren
dye thienden vande vruchten ende beesten thientbaer
wesende, daer van zij luyden ende heurluyder voorsaeten
lange jaeren geweest zijn in duechdelicke possessie
vel quasi hebbende dye thienden aldaer altijts
als daer enighe thientbaere goederen zijn geweest
gebloockt ende verpacht, gelijck oock heurluyder
pachters dye thienden vande voorss. vruchten ende
beesten hebben genooten ten aensien van een yegelick.
Ende all wast daeromme dat Jan Anthoenisz.
Cuyst behoort hadde den supplianten oft heurluyder
pachters te laeten volgen den thient vallende uuyt
zekere thien hont lants ende uuyt noch eene margen
geheeten Lamkens margen in Neerandel
gelegen den voorss. Jan Anthoenisz. toebehoorende
zoo heeft hij nochtans over vijff off ses jaeren
herwaerts het coorn bij hem daerop gesaeyt en[de]
gewasschen thuys gehaelt ende den supplianten
oft heurluyder pachter dye thienden van dyen
onthouden ende dat argher es zoo hij alltemets over
dye bloockingen ende verpachtingen van der
supplianten thiende heeft gestaen als heemraet zoo
heeft hij gepreactizeert dat s'selve thienden uuytte
blockcedullen zijn gebleven, prete[n]deerende dat dye
voorss. landen van thienden te geven vrij ende
exempt zouden zijn overmits d'selve in voorgaende

[scan 131]
jaeren eerst boomgaert ende daer nae hophoven
zijn geweest, boven desen zoo bruyckt d'selve Jan
Anthoenisz. Cuyst zeeckere hoeve lants
toebehoorende jonckvrou Johanna Pieck genaempt
"het Hoff" daerop staende es zekere huysinge,
berch ende schuyr, daer van hij den supplianten
of heurluyder pachter weijgert ende mede enighe
jaeren [-of-] onthouden heeft den crijtende oft beest
thiende. Waer mede alzoo hij den voorschreven
supplianten van heurluyder voorss. possessie oft
heeft gespolieert. Soo versoucken d'selve
supplianten uwer mij?n heeren mandement daer
bij den voorss. Jan Anthoenisz. Cuyst ende allen
anderen des noot zijnde bevoolen zij 't voorss.
spolie te redintegreeren ende dyen volgende
dye onthoudinge van der supplianten voorss.
zoo coorn als crijtende oft beesten thienden vooren
geroert costeloos ende schaedeloos aff te doen
mit interdictie van gelijcken meer te doen en[de]
te betaelen dye costen daeromme gedaen. Ende
in cas van oppositie dat den opposanten dach
beteyckent zij voor desen hove omme te seggen
dye redenen van dyen te verantwoorden op't
versouck bij den supplianten ten daeghe dienende
te doen omme bij provisie in heurluyder voorss.
possessoe vel quasi gerestitueert te worden
ende voorts te zien procedeeren als nae rechte.
Ende alzoo vermits het geloop van het crijchsvolck
leggende tot 's Hertogenbossche en[de] inde Grave
gheen tutus accessus en es ter plaetse daer dye
voorss. Jan Anthoenisz. woont zoo versoucken dye suppl[ia]nten
authorizatie om het exploict te moeghen doen bij

edicte binnen der stede van [-wouderighem-] Woudrichem mit
insinuatie duer eenen boode der selver stede
aen den voorss. Jan Anthoenisz. dit doen[de] etc.

-C. van Kuyck, 1598.